به گزارش پایگاه تحلیلی خبری چهارفصل؛ به نقل از صبح زاگرس؛ بخشعلی برایی از روستای تنگ رواق بخش پاتاوه شهرستان دنا  از شاعران هم استانی شعر طنزی با عنوان ویروس نحس سرود .

#ویروس_ نحس#

کرونا    نا    وَ   نَی   دنیا   نِهایِه
هَمی   دُنیانَه  از  دَم    پا   نِهایِه

کرونا  داعِشِ   شمشیر   وَدَهسِه
یَه ویروسی بَد و بدشوم و نَهسِه

گمون  دارُم   کَکَی    تیمور  لَنگِه
که  بَی  خلقِ خدا  سرگرمِ  جنگه

وَ ری خلقِ خدا شایینَه وَر داشت
روش و سنت و اییینَه  وَر داشت

یَه ویروسی که هیچ درمون نَیاره
سلام و دَهس و ری بوسون نَیاره

تموم خلقِ   خدانَه    کِرده زندون
گروتِه   عالَمینَه     تحتِ    فِرمون

تَموما    بَهسِه  از  دَم  پوزِ   مردم
گِروتِه  کار  و حال  و روزِ    مردم

تمومهِ کسب و کارَه   کِرده تعطیل
وَ یَک  رِهتِه  عمومِ  ایل  و  فامیل

وِ ریشَه رسمِ    مِهمونینَه وَرداشت
عزا  و فاتِحه   خونینَه   وَر  داشت

گمونُم   اومَه  تا هَف  سین   نَبویه
دَ     نوروزی   مِنِه     آیین    نَبویه

کلیسانه    و  پیره      تَخته   کِرده
هَمَی نَر   تیمَه   از  بُن  اَختَه کِرده

مجالِس    گرمِ   مهمونی   وِل  آبی
محافِل  داغِ     داسونی   وِل  آبی

توهم    اومَیه     شایی   وُ غم  رَه
محبت  وُ   صَفا    اِنگار   وَ دَم   رَه

کسی  مِن  فکرِ دَی  وُ بو  وِ  گَو نی
سلام   و حال   و احوالی وَ رَو  نی

مَر      انگاری     که   آخِر     دُنیایِه
بَسا     بالَی  سَری  رَحمِش      بِیایِه

امیدوارُم        خدا    رَحمی   بیاره
بَسا     اَویی     وَ ای   اتش    بُوارِه

مِدوم   ایخا  بشوری  دَهس  و رینَه
بشینی    پَی   پخاری   جُفتِ   زینَه

وَ  ای  زندَی  دَ  حالی  خَش  نَیاریم
دَوا   وُ    الکل  و دَس  کَش  نَیاریم

خدا  یا  بهرِ  هر   دردی   تو  درمون
مَکن  تو   بَندَتَه    خوار   و پریشون

گِمونُم      کِردَیِه     کِردار  خوت  بو
کرونا   هرچه  بو  هَم  کارِ  خوت بو

خداوندا   به   حقِ   هشت  و چارِت
به  حقِ   مَردمه  بی   کسب و کارِت

یَه کاری کُن خوت ای ویروسَه وَردار
خوت  ای  دردِ  بد و مَنحوسَه وَردار

خدا یا   ای    خدایِه  خوب   و دونا
تو   خوت   دونی  وُ ویروسِ  کرونا

گمون دارُم  که  جز   خَشمِ   خدا نی
کرونایی    که    جز   کردار   ما   نی

شکی      نیسِه   که    اسرارِ   خدایِه
نَه   ویروسِه   نه   دردی  بی   دَوایه.

انتهای پیام/